Ўхшаш сўзлар луғати

Ўхшаш сўзлар яни ўзбек тилидаги паронимлар луғати

Паронимлар талаффузнинг ўхшашлиги, морфем составининг қисман яқинлиги туфайли ёзувда, нутқда адаштирилиши мумкин бўлган, қофиялашда, шунингдек, сўз ўйинида ишлатиладиган бошқа-бошқа маънодаги сўзлардир. Масалан: кампания — компания, шароб — шараф сўзлари икки паронимик уяни ташкил этувчи турли маънодаги мустақил сўзлардир.

Кампания — бирор мақсадни кўзлаб маълум вақт, давр ичида ўтказиладиган оммавий ҳаракат маъносини ифодалайди: пахта йиғим-терими кампанияси; экиш кампанияси;

компания— шерикчилик, улфатчилик; буржуа мамлакатларида эса капиталистларнинг савдо ёки саноат ширкати маъноларини ифодалайди: савдо компанияси каби.

Шароб ва шараф сўзлари ҳам алоҳида-алоҳида тушунчага эга бўлган мустақил сўзлиги яққол сезилиб турибди. Лекин шунга қарамай, кўпинча оғзаки нутқда, шунингдек, ёзма нутқда ҳам уларни алмаштириб, хато ишлатиш ҳоллари учрайди. Чойхона доим кишилар билан тўла бўлар, Ҳамза уларга турли темаларда докладлар қилар, тамбур чалиб, ашула айтиб берар эди. («Сов. Ўзб.») Ҳовли сатҳига яшил гиламлардек тўшалган кашнич, укроп, нилдек қоладиган

барра ўсмалар юзида шабнамлар инжудек тобланади. («Ўзб. маданияти».)

Келтирилган фактлардан кўриниб турибдики, ниҳоятда яқинлиги ва ўхшашлигидан танбур ўрнига тамбур, товланмоқ ўрнига тобланмоқ сўзлари ўринсиз ишлатилган. Ваҳоланки, улар бир-бирларидан маъно жиҳатидан тубдан фарқ қиладилар.