Асал - минг дардга даво

Асалнинг фойдали хусусиятлари, қўлланилиши ҳақида энг зарур маълумотлар

Асал – ҳаёт шарбати.

Саховатли табиатда қадим замонлардан асалнинг шифобахш хосияти маълум. Тиббиёт илмининг султони Абу Али ибн Синонинг ёзишича асал мижозни тозалайди, томир йўлини равон қилади, ҳўллик ва газакни шимдирувчи қуввати бор.

У ҳўллик ва газакни баданнинг чуқур эрларидан тортади, гўштни сасиш ва бузилишдан сақлайди, чиркли чуқур яраларни тозалайди. Асал кўз хиралигини кетказади. Уни танглай билан эзиб сўриш ва ғарғара қилиш бўғмадан халос этишга ёрдам беради. Асал суви меъдани кучайтиради, иштаҳани очади, овқат ҳазмини яхшилайди. Аччиқтош билан муштаракликда темираткига даво бўлади. Навқиронликни сақлаш учун, айниқса, ёши 45 дан ошган кишилар асалдан тез-тез истеъмол қилиб туришлари керак.

Муҳаммад Ҳусайн ибн Муҳаммад ал-Оқилий “Махзан-ул-ладвия” (“Даволар хазинаси”) китобида асалнинг хосиятлари ҳақида тўхталиб, унга юксак баҳо беради. Асал аъзоларни тозалайди, тиқилмаларни очади, меъда-ичак деворларидаги хилтларни йўқотади, мияни ортиқча ва зарарли нарсалардан мусаффо этади, фалаж, истисқо, сариқ касалликларига даво бўлади. Саломатликни яхши сақлаш учун ҳар куни наҳорда асални сув билан аралаштириб ичиб туриш лозим. Асал кўкрак ва плеврани яхши тозалайди, талоқ касалликларини даволашда фойдаланилади, эл ҳосил бўлишини тўхтатади, буйрак, қовуқдаги тошларнинг эришига ёрдам қилади, зўриқиб сийишда энгиллик беради.