Siz payg'ambarni ko'rganmisiz?

Payg‘ambarimiz (s.a.v.) siyratlaridan savol-javob musobaqasi

IMOM BUXORIY NOMLI TOSHKЕNT ISLOM INSTITUTI

SIZ PAYG‘AMBARNI KO‘RGANMISIZ?

Payg‘ambarimiz (s.a.v.) siyratlaridan savol-javob musobaqasi

Birinchi kitob: Makka davri

Muallif: Abdul Azim ZIYOUDDIN

«Toshkent Islom universiteti» nashriyot-matbaa birlashmasi

Toshkent-2007

Abdul Azim Ziyouddin o‘g‘li 1974 yil Chirchiq shahrida tug‘ilgan. 1991-1994 yillarda Buxorodagi «Mirarab» madrasasida tahsil olgan. So‘ngra 1997 yili Toshkent Islom institutini tugatgan. Hozirda shu dargohda «Tahfizul Qur’on» bo‘limida mudarris.

Muallif ushbu kitobida Payg‘ambar alayhissalom siyratlariga yangicha uslubda murojaat etgan. Aniq ma’lumotlarga tayangani asarning qiymatini oshirsa, tez-tez hayajonli bayonlarni keltirishi badiiy rang-barangligini ta’minlaydi. Xullas, o‘quvchi bu kitob orqali siyratga oid bilimlarini tiniqlashtirib, ko‘p mavhumotlariga aniqlik kiritib olishi shubhasiz.

Siyrati sharifga «sayr»ingiz xayrli kechsin.

Zamonamizning yaxshilaridan biri: «Agar Muhammad alayhissalom bo‘lmaganlarida, dunyoni yoritishga bu quyoshning nuri yetmasdi», degan edi. Darhaqiqat, Muhammad alayhissalomning nurlari zim-zimiston ichimizni yoritmasa, muz qalblarimizni eritmasa, osmondagi quyosh hech narsa qilolmas edi. Shuning uchun ham bu Nur sari talpinishimiz cheksizdir.

U zotga Allohdan beadad salavot va salomlar yo‘llaymiz. Diydorlarini ko‘rishga mushtoqmiz. Hatto muborak ravzalari sari talpinamiz. Uzotni bizga sog‘intirgan, nurlari ila qalblarimizni nurlantirgan Alloh taologa hamdu sanolar aytamiz.

Aziz o‘quvchi, qo‘lingizdagi ushbu ajib sarlavhali kitob Payg‘ambarimizga bo‘lgan sog‘inchning, nurlari sari talpinishning bir ko‘rinishidir. Ustozlar uning uslubi, boshqa siyrat kitoblaridan farqi, foydali jihatlari haqida xo‘b aytibdilar. Kaminangizga esa, asarning sarlavhasi haqida ozgina tushuncha berib o‘tish vazifasi topshirildi.

«Siz Payg‘ambar alayhissalomni ko‘rganmisiz?»

Bir qarashda g‘alati savol. Chunki siz-u bizning u zotni ko‘rmaganimiz oyday aniq. Ammo bir paytlar u zotni ko‘rganlarga shu savol berilganda, cho‘k tushib yig‘lashgan, sim-simSiz Payg‘ambarni ko‘rganmisiz? yig‘lashgan, Payg‘ambarga bo‘lgan sog‘inchlarini bosolmay yig‘-lashgan... Ularning holatlarini o‘ylasam, ayni savol mening ham yuragimni o‘rtay boshlaydi. Menga ham shu savol bilan murojaat etishlarini istab qolaman. Payg‘ambar alayhissalomga shunchalar yaqin bo‘lgim keladi.